आवडती मुलगी आपल्याशी न बोलता इतर मुलांशी बोलत होती , नैराश्यातून तरूणाने उचलले टोकाचे पाऊल

 

बुलढाणा : आपली आवडती मुलगी आपल्याशी न बोलता इतर मुलांशी बोलत असल्याने एका महाविद्यालयीन तरूणाने नैराश्यातून जीवन संपवल्याची घटना बुलढाण्यात उघडकीस आली आहे.

महाविद्यालयातील एका वर्ग खोलीतच विद्यार्थ्याने जीवन संपवल्याने खळबळ माजली आहे. सूरज गावंडे असे आत्महत्या करणाऱ्या विद्यार्थ्याचे नाव आहे. सूरज बीकॉमच्या पहिल्या वर्षात शिकत होता. महाविद्यालयात वर्ग खोलीत परीक्षा क्रमांक टाकण्याचे काम सुरु होते. यावेळी महाविद्यालयातील कर्मचाऱ्यांना सूरजचा गळफास घेतलेल्या अवस्थेत आढळून आला. याप्रकरणी जळगाव जालोद पोलीस ठाण्यात नोंद करण्यात आली आहे.

श्रीपाद कृष्ण कोल्हटकर महाविद्यालयातील घटना

बुलढाणा जिल्ह्यातील जळगाव जामोद तालुक्यातील श्रीपाद कृष्ण कोल्हटकर महाविद्यालयात ही घटना घडली. काल बीकॉम प्रथम वर्षाचा अकाउंट या विषयाचा पेपर होता. पेपर सुरू होण्याआधीच या विद्यार्थ्यांना एका वर्ग खोलीत आत्महत्या केली आहे.

वर्गात परीक्षा क्रमांक टाकत असताना घटना उघडकीस

बीकॉमच्या प्रथम सत्राची सध्या परीक्षा सुरू आहे. वर्ग खोलीत विद्यार्थ्यांचे परीक्षा क्रमांक टाकण्याचे काम सुरू होते. यावेळी महाविद्यालयाच्या कर्मचाऱ्यांना हा विद्यार्थी गळफास घेतलेल्या अवस्थेत आढळून आला. त्यामुळे संपूर्ण जिल्ह्यात एकच खळबळ माजली आहे.

खिशात चिट्ठी सापडली

तात्काळ घटनेची माहिती जळगाव जामोद पोलीस तात्काळ घटनास्थळी रवाना झाले. पोलिसांनी मृतदेह ताब्यात शवविच्छेदनासाठी रुग्णालयात पाठवला. पोलिसांनी मृतदेहाची तपासणी केली असता खिशात एक चिट्ठी सापडली.

काय लिहलंय चिट्ठीत?

या चिट्ठीत ‘एक मुलगी माझ्याशी न बोलता इतर मुलांशी बोलत होती’ अशा आशयाची माहिती लिहिलेली आहे. विशेष म्हणजे त्याने एका रजिस्टरमध्ये आणखी तीन मुलांची नावे देखील लिहिलेली असल्याने सूरजने एकतर्फी प्रेमातून आत्महत्या केली असल्याचा पोलिसांनी अंदाज व्यक्त केला आहे.

याप्रकरणात पोलीस पुढे काय कारवाई करतात याकडे साऱ्यांचे लक्ष लागून आहे. मात्र अजूनही कोणतीच कारवाई नाही.